બે જિંદગી

બે જિંદગી

“આપણા લીધેલા ફૈસલાને કાયમ રાખવા આજ પછી આપણે બંને એકબીજાની જિંદગીમાં સહેજ પણ દખલ નહિ કરીએ. બસ આ આપણી છેલ્લી મુલાકાત હશે. પણ આજનો આખો દિવસ હું તારી સાથે પસાર કરવા માંગું છું.” ચોમેર વરસતા વરસાદમાં ભીંજાયેલી આંખો સાથે જૈવિકે પરિતાને કહ્યું. આજે આ બે જિંદગીઓ છૂટી પડી રહી હતી. પોતાની મોટી બહેને માતા-પિતાની વિરુદ્ધ જઈને બીજી જ્ઞાતિમાં લગ્ન કર્યા હતા. અને આ બાબતને લઈને પરિતાના કુટુંબમાં એક જ્વાળામુખી ફાટ્યો હતો. એવામાં જો પરિતાના પ્રેમ પ્રકરણ વિષે ખબર પડે તો બળતામાં ઘી હોમવા જેવું થાત. પરિતાના માતા-પિતાએ પોતાની નાની દીકરી આવું કોઈ પગલું ન ભારે તે માટે પરિતાની પસંદ-નાપસંદ જાણ્યા વગર જ તેના લગ્ન પોતાની જ્ઞાતિના ઉચ્ચ કુટુંબમાં નક્કી કરી દીધાતા. આજના મોર્ડન જમાનામાં પણ સંસ્કારી દીકરીએ પોતાના માતા-પિતાની વાતનું માન રાખી તેમણે લીધેલા નિર્ણયનો સ્વીકાર કર્યો હતો. બે દિવસમાં તો સફળ પ્રેમી-પંખીડાઓ લગ્ન માટે નિષ્ફળ બની રહ્યા હતા. એકબાજુ પરિતાના ઘરે ગોળ-ધાણા ખવાઈ રહ્યા હતા અને બીજીબાજુ જૈવિકના ઘરે છોકરીવાળા તરફથી જન્માક્ષરની આપ લે થઇ રહી હતી. જૈવિકને ખ્યાલ આવી ગયો હતો કે પરિતાનો સાથ હવે થોડા દિવસ માટે જ છે. અને આખરે તેમણે એવો ફૈસલો લીધો કે, તે પોતાના આ સાચા પ્રેમને વધુ આગળ નહિ લંબાવે. અને તેઓ પોતપોતાની જિંદગીમાં આવનાર નવા જીવનસાથીને પ્રેમથી સ્વીકારશે. આ બે જિંદગીઓ બીજી આવનારી બે જિંદગીઓ માટે પોતાની જિંદગીઓ સાથે રમત રમી રહ્યા હતા. આખો દિવસ સાથે વિતાવ્યા પછી જૈવિક અને પરિતા છુટા પડ્યા. થોડાક સમય બાદ પરિતાએ પોતાના માતા-પિતાએ પસંદ કરેલા મુરતિયા વિનય સાથે લગ્ન કરી લીધા. અને જન્માક્ષર મળતાની સાથે જ જૈવિકે પણ ઝલક માટે હા પાડી દીધી.

હવે પરિતા અને જૈવિક બંને એકબીજાના પ્રેમને ભૂલી ચુક્યા હતા પણ પરિતાને સપનામાંય ખ્યાલ ન હતો કે જે નવી eeજિંદગી માટે પોતાની જિંદગી દાવ પર લગાવીતી તે તેનો સાથ નહિ આપે. થોડાક દિવસ વીત્યા ને મોરે કળા કરવાની શરુ કરી. વિનય પરિતા નો ધીરે ધીરે તિરસ્કાર કરવા લાગ્યો અને પરિતા સાથેનું વર્તન અજુગતું થવા લાગ્યું. વિનય પહેલેથી જ કોઈ છોકરીના ચક્કરમાં હતો અને એ છોકરી એ વિનય ને પોતાની પ્રેમજાળમાં ફસાવી રાખ્યો તો. વિનય એ છોકરી પાછળ ધનદોલતથી માંડી સમાજમાં મેળવેલી પ્રતિષ્ઠા પણ ગુમાવી રહ્યો હતો. પરિતાએ પોતાના પ્રેમી જૈવિકને આપેલા વાયદા મુજબ ઘરસંસાર ના ભાંગે તે માટે સતત પ્રયાસ કરતી રહી. પરિસ્થિતિ એટલી કપરી આવી ગઈ કે ના છુટકે પરિતા એ વિનયને છૂટાછેડા આપવા પડ્યા. વિનયે પેલી છોકરી જોડે લગ્ન કરી લીધા અને પરિતા એકલી પડી. હવે પરિતાને પોતાની સાથે બનેલી આ કરુણ ઘટનાનો ખુબ જ અફસોસ હતો. કારણ કે એ ધારત તો જૈવિક જોડે માતા પિતાની વિરુદ્ધ જઇ લગ્ન કરી લીધા હોત. થોડાક દિવસ સુધી ઘરમાં લોકો સાથે મતભેદ રહેત પણ આખરે જિંદગીમાં આવી ઘટના તો ના બનત. પણ આવા અફસોસો કાઈ જિંદગી થોડી બદલે છે.

પોતાની દીકરીની ચિંતામાં પરિતાના પિતા બીમાર પડ્યા અને તેમને હોસ્પિટલમાં દાખલ કરવા પડ્યા. આ ભરચક હોસ્પિટલમાં જગ્યા ઓછી હોવાથી તેના પિતાને જનરલ વોર્ડમાં રાખ્યાતા. એકાદ પડદો નાખો એટલે જનરલ વોર્ડ સેમી સ્પેશિઅલ વોર્ડ બની જાય. ત્યારબાદ પડદા પાછળથી એક અવાજ આવ્યો કે, “ચાલ દીકરા જૈવિક, હું રજા લઉં. તું તારા મમ્મી જાગે એટલે યાદ આપજે.” જૈવિક નામ સાંભળતા જ પરિતાની આંખો ચાર થઇ. એક જુનો પડદો હટ્યો ને જૂની યાદો બહાર આવી. પરિતા અને જૈવિકે એકબીજા સામે જોયું. જૈવિકે પરિતા ને પૂછ્યું, “કેમ છે?” પરીતાના મોમાંથી એકાદ શબ્દ પણ ના નીકળ્યો. પાછળથી પોતાની હૈયા વરાળ ઠારતા પરિતા એ બધી જ વાતો જૈવિકને કરી. જૈવિક પાસે ઘણા શબ્દો હતા પણ આ સમય ન હતો કે જે પરિતાને સમજાવી શકે. પરિતાની આ વાતો સાંભળી જૈવિકને ખુબ દુઃખ થયું. તે પરિતાને સાંત્વના આપતા કહ્યું કે, “હું તારો દર્દ સમજી શકું છું. પણ હું અત્યારે લાચાર છું. એ વાત હું માનું છું કે એક વખત હું તારા માટે કાઈ પણ કરી શકું તેમ હતો પણ હવે સમય બદલાયો છે. આપણે લીધેલા ફૈસલા મુજબ હું ઝલકને અપનાવી ચુક્યો છું. અને અમે બંને જણા એકદમ ખુશ છીએ. અને ઝલક મારી જિંદગીમાં આવી પછી મારી પ્રગતિ ખુબ સારી થઇ છે. કદાચ જો હું એની સાથે સુખી ના હોત તો હું તારા માટે વિચારત પણ હવે એ શક્ય નથી.” જૈવિકને શાંત પાડતા પરિતા બોલી, “હું તો માત્ર તને જોઈને પોતાને રોકી ના શકી. તું ખુબ સુખી છે એ વાત જાણીને આનંદ થયો. થોડા સમય પહેલા કરેલા આપણા ફૈસલામાં તું પોતાની જિંદગી જીતી ગયો પણ હું મારી જિંદગી હારી ગઈ. કાઈ વાંધો નહિ, આપણા બે ની જિંદગીમાંથી એકાદ જિંદગી ખુશ હોય તો બીજું શું જોઈએ. આમેય એક વખત આપણે એક જ જિંદગી હતા” બસ બંને જણાએ આખો દિવસ સાથે વિતાવ્યોને વળી પાછા એકબીજાની જિંદગીમાં દખલ ન કરવાની શરતે છુટા પડ્યા....

“ઘણી કરી ઈશ્વરની પૂજા ને ઘણી કરી ખુદાની બંદગી,
પણ આજે મળી સફળતા જ્યાં સુધારી કોઈની જિંદગી.”

- નિશાંક મોદી

મિત્ર કહું કે.....

A Friendship Day- એક એવો દિવસ જયારે બધા જ મિત્રો પોતાની મિત્રતાનો પરિચય આપવા આતુર હોય છે. એમાંનું જ એક ગ્રુપ હતું નીલમનું. પણ ગ્રુપ ની ખાસિયત એ હતી કે ચાર જણાના ગ્રુપમાં બસ નીલમ જ છોકરી. થોડાક વર્ષો પહેલા રાજે નીલમનો પરિચય સુનીલ અને સૌમ્ય સાથે કરાવ્યો હતો. પણ હવે તેઓ ખુબ સારા મિત્રો બની ચુક્યા હતા. પરિચયમાં આવ્યા પછી એવું ક્યારેય નતું બન્યું કે નીલમના સારા કે ખોટા પ્રસંગમાં ત્રણેયની હાજરી ના રહી હોય. જયારે નીલમના પપ્પાને એટેક આવ્યો હતો ત્યારે રાજે જ પોતાના પિતાની ઓળખાણ કાઢી મેડીકલ ટ્રીટમેન્ટના ખાસા એવા રૂપિયા બચાવ્યાતા. સુનીલનું ઘર હોસ્પિટલથી નજીક હોવાથી નીલમ અને તેના પરિવારનું જમવાનું ત્યાંથી આવતું. અને સૌમ્ય હોસ્પિટલમાં રાત રોકાતો અને સવારે નીલમના આવ્યા પછી જ ઘરે જતો. આતો વાત હતી નીલમના ત્યાં બનેલા ખરાબ પ્રસંગની પણ નીલમની ખુશી બમણી થાય એવો તેની સગાઈનો પ્રસંગ આવ્યો હતો. નીલમની સાથે ત્રણેય મિત્રો ખુબ જ ખુશ હતા. ૬ જુને ૨૦૧૦ ના રોજ નીલમની સગાઇ રાહુલ સાથે થઇ. સૌથી મોઘી ભેટ નીલમને રાજે આપી. રાજના પિતા મોટા બિઝનેસમેન હતા અને રાજના જીવનની રાહ પર આપકમાઈ કરતા બાપકમાઈ શબ્દ વધુ વપરાતો. રાજે નીલમને ગીફ્ટ આપતા અભિમાનથી કહ્યું કે, “આજે એક હિરોઈન ને બે હીરો મળી રહ્યા છે. એક હીરો ના રૂપમાં રાહુલ અને બીજો આ નેકલેસમાં જડેલો નાયાબ ડાયમંડ.” સુનીલ અને સૌમ્ય એ પણ પોતાની પરિસ્થિતિ મુજબ ભેટસોગાદો આપી. ત્યારબાદ બધા પોતાની રોજિંદી લાઈફમાં બીઝી થઇ ગયા. ત્રણેય મિત્રો સગાઇ બાદ નીલમની લાઈફમાં વધુ દખલગીરી ન કરતા.

હવે રાહુલ અને નીલમ પોતાની લાઈફના ગોલ્ડન પીરીયડમાંથી પસાર થઇ રહ્યા હતા ત્યાં મિત્રો માટે ખુબ જ યાદગાર એવો ઓગસ્ટ નો પહેલો રવિવાર એટલે કે ફ્રેન્ડશીપ ડે આવ્યો. સગાઇ પછીનો આ પહેલો જ ફ્રેન્ડશીપ ડે હતો. રાહુલ ને નીલમના ત્રણેય મિત્રોને પહેલેથી જ મળેલો હતો અને એણે ખ્યાલ હતો કે નીલમને એના મિત્રો પ્રત્યે કેટલો લગાવ છે. રાહુલે નીલમની જાણ બહાર સામેથી જ ત્રણેય મિત્રોને ફોન કરી પોતાના ઘરે બોલાવ્યા. નીલમને એમ કે ત્રણે મિત્રો તેણે ફોન કરી વિશ કરશે પરંતુ ત્રણે જણા રાહુલની જોડે ઘરે આવી જશે તેવું નતું વિચાર્યું. નીલમ માટે આ પહેલો ફ્રેન્ડશીપ ડે હશે જેમાં પોતાના ફીયાન્સની સાથે તેના મિત્રો પણ હાજર હતા. આ અનેરા દિવસ માટે નીલમને જુદી જુદી સરપ્રાઈઝ મળી. રાહુલે ત્રણે મિત્રોને બોલાવી નીલમને અચંબામાં મૂકી દીધી. રાજે નીલમને સિલ્વર કલરની એક સ્વીફ્ટ કાર આપી. પણ આ સરપ્રાઈઝ શબ્દ અહી અટકતો નથી. સુનીલે પહેલેથી જ ટીજીબીમાં ડીનરનું એરેન્જમેન્ટ કરેલું હતું. પાંચેય મિત્રો ડીનર બાદ નીલમની સ્વીફ્ટમાં બેસી લોંગ ડ્રાઈવ પર જવા નીકળ્યા. જવાનીનો જોશ હોશ ગુમાવે. એમ જ રાજના ખરાબ ડ્રાઈવિંગને કારણે તેમને એક અકસ્માત નડ્યો. નીલમ સિવાય બાકી બધાને સામાન્ય ઈજા પહોંચી. ને બસ પછી કોઈને કઈ જ યાદ ના આવ્યું.

જયારે નીલમને હોશ આવ્યો ત્યારે તે હોસ્પિટલમાં હતી. અને તેણે પરિવારજનોના આંખોમાંથી આંસું વહેતા જોયા. આ અકસ્માતે નીલમની જિંદગી બદલી નાખીતી. નીલમનો કમરથી નીચેનો ભાગ પેરેલાઈઝ થઇ ગયો હતો. બે સભ્યો સિવાય ત્યાં બધા જ હાજર હતા. એક ન હાજર હતા તો રાહુલ અને સૌમ્ય. નીલમે પૂછ્યું કે, “રાહુલ અને સૌમ્ય ક્યાં છે?” જવાબમાં સુનીલે કહ્યું, “એ બંને જણા મેડીસીનને રીપોર્ટ લેવા ગયા છે.” રાજ નીલમની માફી માંગતા જ જમીન પર ઢળી પડ્યો. એને પોતાની ભૂલ પર ખુબ જ પસ્તાવો હતો. બસ ત્યાં તો રાહુલ અને સૌમ્ય આવી પહોંચ્યા. રાહુલ અને નીલમને એકાંતમાં મૂકી બધા જ લોકો રૂમની બહાર ગયા. નીલમે રાહુલને પૂછ્યું, “શું તું મને હજી પણ તારા જીવનની સાથી બનાવીશ?” થોડીકવાર રહીને રાહુલે જવાબ આપ્યો, “હા, હું જરૂરથી તને જીવનસાથી બનાવીશ. પણ તારે આ માટે તારા મિત્ર સૌમ્યનો આભાર માનવો પડશે.” નવાઈ પામેલી નીલમે પૂછ્યું, “સૌમ્યનો કેમ?” રાહુલ બોલ્યો “તને થોડી નવાઈ લાગશે પણ તારી આવી હાલત જોઈ મેં એક વખત તને છોડી દેવાનો વિચાર કર્યો હતો. ત્યારે સૌમ્ય એ મને કહ્યું હતું કે, “રાહુલ, જો આ ઘટના તારી જોડે થઇ હોત તો નીલમ તને ક્યારેય છોડીને ન જાત.” બસ એણે એક વાક્યમાં મને ઘણું બધું સમજાવી દીધું. હું સાચા પ્રેમી તરીકેની ફરજ ભૂલી ગયો તો પણ સૌમ્ય પોતાની મિત્રતાની ફરજ નતો ભૂલ્યો. અને સૌમ્ય એ જ મને સાચો રસ્તો બતાવ્યો.” એકબીજાનો હાથ પકડી રાહુલ અને નીલમ રડી રહ્યા હતા. આખરે નીલમ એટલું બોલી કે, “મેં ગયા જન્મમાં કોઈ સારા કર્મો કર્યા હશે માટે જ મને આવા સારા મિત્રો મળ્યા છે. પણ હું આ સૌમ્યને હવે મિત્ર કહું કે ઈશ્વર એ જ સમજાતું નથી. કદાચ ફ્રેન્ડશીપ ડે ના દિવસની બાકી રહેલી સરપ્રાઈઝ ગીફ્ટ સૌમ્ય એ ઈશ્વર બની ને આપી જે મારા જીવનની સૌથી યાદગાર ભેટ હોઈ શકે.....”

“પડે તને આપદા તો એને સુખમાં પલટાવી દઈશ,
સમય આવવા દે હું આપણી મિત્રતા બતાવી દઈશ.”

નિશાંકમોદી